काठमाडौं- राष्ट्रिय क्रिकेट टोलीका कप्तान र उप कप्तान सम्मिलित प्रदेश-३ ले प्रधानमन्त्री कप एकदिवसिय प्रतियोगितामा दोस्रो जीत हात पारेको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा मंगलबार भएको खेलमा गण्डकी प्रदेशले दिएको १ सय १२ रनको झिनो लक्ष्य २२ ओभर २ बलमा ३ विकेट गुमाएर पूरा गर्‍यो ।

प्रदेश-३ का लागि अदिल खानले ३८ रन बनाउँदा इशान पाण्डेले २६ रनको योगदान गरे । यस्तै रित गौतमले २० रन बनाउँदा रविन जोशीले ११ रन बनाए । कम रनको लक्ष्य पाएको उक्त खेलमा प्रदेश नम्बर ३ का स्टार खेलाडी तथा कप्तान पारस खड्का र ज्ञानेन्द्र मल्लले मैदान उत्रिनु परेन । प्रदेश-३ विरुद्ध गण्डकीका किशोर महतोले २ तथा विपीन खत्रीले १ विकेट लिए ।

यसअघि पहिले ब्याटिङ गरेको गण्डकीले ३० ओभर १ बलमा सबै विकेट गुमाएर १ सय ८ रन बनाएको थियो । प्रदेश-३ का कप्तान खड्का र सूर्य तामाङको बलिङ चम्केपछि गण्डकी छोटो योगफलमा समेटिएको थियो ।

गण्डकीका लागि सुम घिमिरेले ३४ रन बनाउँदा आकाश थापाले २८ रन बनाए । गण्डकीविरुद्ध प्रदेश–३ का कप्तान खड्का र सूर्य तामाङले समान ४-४ विकेट लिए । यस्तै, नन्दन यादवले २ विकेट लिए । जीतसँगै प्रदेश-३ ले ३ खेलबाट ४ अंक जोडेको छ ।