काठमाडौं– अख्तियार दुरुपयोग अनुसन्धान आयोगले चेकजाँचका क्रममा प्रहरीलाई घुस दिन खोज्ने सवारी चालकसहित ३ जनाविरुद्ध भ्रष्टाचार मुद्दा दर्ता गरेको छ ।

भारतको नयाँदिल्लीबाट बाँकेको नेपालगन्ज हुँदै गत चैत ३० गते काठमाडौं भित्रिएको गाडीमा भन्सार छली गरि ल्याइएका सामान प्रहरीले बरामद गरेको थियो ।

महानगरीय प्रहरी बृत्त स्वयम्भूबाट खगिएको प्रहरी टोलीले ना ५ ख ४८४२ नम्बरको यात्रुबाहक बसबाट भन्सार छली गरेर ल्याइएका अवैध सामान बरामद गरेको थियो ।

बस चेकजाँचका क्रममा बसका चालक श्याम विश्कर्माले प्रहरीलाई ३ लाख रुपैयाँ घुस दिन खोजेका थिए । यस्तै गाडीमा रहेका दिपा राना र भरत तामाङले थप ५० हजार रुपैयाँ प्रहरीलाई घुस दिन खोजेका थिए ।

प्रहरीले घुस दिन खोज्ने तीनैजना र बसलाई समेत नियन्त्रणमा लिएको थियो । घुस दिने खोज्ने ३ जनालाई अख्तियार दुरुपयोग अनुसन्धान आयोगको जिम्मा लगाइएको थियो ।

अख्तियारले तीनैजनामाथि छानबिन गरी आइतबार विशेष अदालतमा भ्रष्टाचार मुद्दा दर्ता गरेको हो ।