भलेटा– भूमध्यसागरमा रहेको टापु मुलुक माल्टाको फौजले आप्रवासीले अपहरण गरेको मालवाहक ट्यांकर मुक्त गरेको छ । लिबियाको तट पारीबाट अपहरणमा परेको ट्याङ्करलाई माल्टाको सेनाले नियन्त्रणमा लिएर भलेटाको बन्दरगाह पुर्‍याएको हो ।

लिबियाको तटपारी अलपत्र परेका आप्रवासीको उद्धार गर्न पुगेको ट्याङ्करलाई आप्रवासीले अपहरण गरेका थिए । अलपत्र परेका उनीहरुले आफूलाई लिबिया नै फिर्ता गर्न लागिएको चाल पाएर ट्यांकर अपहरण गरेका थिए ।

ट्याङ्करमा १ सय ८ आप्रवासी रहेको बताइएको छ । माल्टाका प्रहरीले अपहरणमा संलग्न भनिएका ४ जनालाई पक्राउ गरेको छ भने अन्य आप्रवासीलाई ट्याङ्करबाट उतारेर बसमा चढाएर अन्यत्र पठाएको जनाइएको छ ।

लिबियाबाट माल्टाको जलक्षेत्रमा आएका ट्याङ्करलाई माल्टाको जलसेनाले रोक्ने प्रयास गरेको थियो । तर, ट्याङ्करका क्याप्टेनले ट्यांकर आफ्नो नियन्त्रणमा नरहेको र आप्रवासीहरुले आफूलाई धम्की दिइरहेको बताएपछि माल्टाको सेनाले कारवाही गरी ट्यांकर आफ्नो नियन्त्रणमा लिएर राजधानी भलेटाको बन्दरगाह पुर्‍याएको थियो ।