काठमाडौं– दोस्रो संस्करणको नमस्ते पोखरा प्रिमियर लिग (पीपीएल) टी २० क्रिकेट प्रतियोगिताको उपाधि चितवन राइनोजले जितेको छ ।

पोखरा रङ्गशालास्थित क्रिकेट मैदानमा आज भएको फाइनल खेलमा विराटनगर टाइटन्सलाई ३२ रनले पराजित गर्दै पारस खड्काको कप्तानीमा रहेको चितवनले उपाधिसहित रु २७ लाख पुरस्कार पायो ।

खेलमा टस जितेर विराटनगरले फिल्डिङ रोजेपछि साबिक उपविजेता चितवन पूरै ओभर खेल्दै पाँच विकेटको नोक्सानीमा २०२ रनको विशाल योगफल तयार गरेको थियो ।

प्रतियोगिताको उपाधिका लागि २०३ रनको विजयी लक्ष्य पछ्याएको विराटनगर निर्धारित ओभरमा सात विकेट गुमाउँदै १७० रनमा समेटियो । उपविजेता बनेको विराटनगरले रु १० लाख पुरस्कार पाएको छ ।

शुरुवाती ब्याट्सम्यान मोहमद जैद आलमले पाँच चौका र तीन छक्कासहित ४८ बलमा ५७ रनको अर्धशतक तथा कप्तान प्रदीप ऐरीले २५ बलमा ३६ र पुनित मेहराले १३ बलमा ३२ रन जोडे पनि टोलीलाई जित दिलाउन असमर्थ भए ।

चितवनका करण केसीले आफ्नो चार ओभर बलिङमा ३६ रन खर्चिएर सर्वाधिक तीन तथा सन्नी पटेलले दुई र रोहन मुस्ताफाले एक विकेट लिएका थिए ।

चितवनको विशाल योगफल तयार गर्नमा रोहन मुस्ताफा र अनिल शाहले अर्धशतक पूरा गरे । मुस्ताफाले ४३ बलमा ५० रन जोडे । भने शाहले ३४ बलमा ५० रनको योगदान दिँदै टोलीको इनिङ्स माथि उकास्न योगदान दिए ।

करण केसी अविजित रहँदै आठ बलमा २६ तथा कप्तान खड्काले ११ बलमा २५ रनको योगदान दिए । विराटनगरका पुनित मेहरा मुहमद जैद आलमले समान दुई/दुई तथा किशोर महतोले एक विकेट लिए ।

पारसलाई ढोग्ने समर्थक

यसैबीच चितवनलाई उपाधि जिताएका कप्तान पारस खड्कालाई समर्थकले मैदानमै छिरेर ढोग्न खोजेका छन् । अन्तिम बलमा बिराटनगरका जितेन्द्र मुखियाले चौका प्रहार गरेका थिए तर पनि त्यो जितक लागि पर्याप्त भएन ।

त्यतिनै बेला चितवनका दुई जना समर्थक दौडिएर मैदानमा प्रवेश गरे । कालो स्वीटर लगाएर एक जना र नेपाली क्रिकेटको जर्सी लगाएका अर्का समर्थक मैदानमा प्रवेश गरेका थिए ।

नेपालको जर्सी लगाएका एक समर्थक पारस खड्का नजिक पुगेर घुँडा भुइमा टेक्दै पारसलाई ढोक्न खोजेका थिए। तर पारस केही पर सरे । तर उनले पछि पारसको खुट्टा भने छोए । उनलाई पारसले उठाए र अंगालो मारे । ती समर्थकलाई पछि आयोजकले बाहिर निकाले ।