धनुषा– नेपाली कांग्रेसका सभापति शेरबहादुर देउवाले वर्तामान सरकारले मधेशी जनताका समस्यालाई सुन्न नचाहेको आरोप लगाएका छन् ।

शनिवार धनुषा पुगेका देउवाले नेपाली कांग्रेसका नेता बलराम नायकको श्रद्धाञ्जली सभामा भने,‘अहिले ओली सरकार मधेशी जनतालाई सुन्नै चाहदैन, त्यसैले सरकार विरुद्ध सबै एकजुट भएर अघि बढ्ने बेला भएको छ ।’

देउवाले वर्तमान सरकारले मनपरी रुपमा शासन सत्ता सञ्चालन गरिरहेको आरोपसमेत लगाए ।

कम्युनिस्ट सरकारले हरेक आयोग गठनमा एकलौटी गरिरहेको र शाही आयोग जस्तै बनाउन खोजेको आरोप देउवाको थियो ।

देउवाले कांग्रेस एक भए कसैको केही नलाग्ने बताउँदै पार्टीमा गुटबन्दी अन्त्य गर्नुपर्ने बताए ।

लोकतन्त्र र संघीयता जोगाउन कांग्रेस एकजुट भएर अघि बढ्नुको विकल्प नभएको देउवाको भनाइ थियो ।