काठमाडौं- चलचित्र ‘१२ सत्ताईस’ को फस्टलुक पोस्टर सार्वजनिक गरिएको छ । तिहारको अवसर पारेर शुभकामनासहित चलचित्र १२ सत्ताईस टिमले आइतबार फस्टलुक सार्वजनिक गरेको हो ।

जोन योञ्जनको निर्देशनमा तयार भएको चलचित्रको फष्टलुक पोस्टरमा चलचित्रका मुख्य पात्रहरूलाई स्थान दिइएको छ । जोनले यसै चलचित्रबाट निर्देशनमा डेब्यु गर्दै छन् ।

‘१२ सत्ताईस’ मा समीर श्रेष्ठ, अभिषेक नेपाल, काजी राना, अस्मिता लामिछाने, समरांत थापा, अभोन राज उप्रेती, भीष्म जोशी, अस्मिता खनाल, बिना कार्कीलगायत कलाकारको प्रमुख भूमिका रहेको छ ।

चलचित्रमा समसामयीक कथा वस्तुलाई समेटिएको चलचित्र निर्माण टिमको भनाइ छ । निर्देशक जोनले भने, ‘उत्कृष्ट चलचित्र बनाउन स्टार काष्ट नै चाहिन्छ भन्ने छैन कथा र पात्र बलियो भए चलचित्र राम्रो बन्छ र ‘१२ सत्ताईस’ले पनि दर्शकको मन जित्छ ।’

ह्यप्पी प्लानेट फिल्मस् र कमेरो फिल्म स्क्रिनको सहकार्यमा निमार्ण भएको १२ सत्ताईस आउँदो मंसिर २७ गते प्रदर्शन हुने छ ।