काठमाडौं – सन् २०१८ मा रिलिज भएको कन्नड फिल्म ‘केजीएफ’ ले बक्स अफिसमा धूम मच्चायो । नेपालमा पनि फिल्म उत्तिकै रुचाइयो । अभिनेता यशको यो फिल्मले हिन्दी भाषामा रिलिज हुँदा बढी कमाएको थियो ।

पहिलो सिक्वेलको सफलतापछि यसको दोस्रो सिक्वेलमा बलिउडका चर्चित कलाकारलाई लिन निर्माण टिमले रुचि देखाएको छ । पहिले नै खबर आएको थियो कि, यो फिल्मको दोस्रो भागमा सञ्जय दत्तको अहम् भूमिका रहने गरी अप्रोच गरिएको छ । ‘सञ्जु बाबा’ पछि अब यो फिल्ममा रविना टण्डनलाई पनि प्रस्ताव गरिएको खबर आएको छ ।

टाइम्स अफ इन्डियाको एक रिपोर्टले रविनाको पनि महत्त्वपूर्ण भूमिका रहने गरी अप्रोच गरिएको लेखेको छ । यद्यपि सञ्जय दत्त र रविनालाई फिल्ममा लिइएको फिल्म निर्माण टिमको आधिकारिक जानकारी आएको छैन ।

‘केजीएफ’को पहिलो च्याप्टरले ग्लोबल मार्केटमा पनि राम्रो प्रतिक्रिया पाएको छ । फिल्मलाई कन्नडका अलावा हिन्दी, तेलुगू, तमिल र मलयालम भाषामा पनि रिलिज गरिएको थियो ।

यो फिल्मले शाहरुख खानको ‘जिरो’ सँग टक्कर लिएको थियो । जसका कारण शाहरुख खानको फिल्मलाई व्यापारिक नोक्सान भएको थियो । ‘केजीएफ’ ले हिन्दी भाषामा मात्र ४५ करोड कमाइ गरेको थियो ।

यो फिल्मको दोस्रो च्याप्टरको चाहिँ दर्शकमा अहिलेदेखि नै प्रतीक्षा छ ।