एजेन्सी– अमेरिकी राष्ट्रपति डोनाल्ड ट्रम्प तथा उत्तर कोरियाली सर्वोच्च नेता किम जोङ उनबीचको दोश्रो शिखर वार्ता भियतनामको राजधानी हनोईमा आज (बुधबार)बाट शुरु हुँदैछ । शिखर वार्ताका लागि दुबै नेता हनोई पुगिसकेका छन् ।

मंगलबार दिउँसो रेलमार्गबाट चीनको बाटो हुँदै उत्तर कोरियाली सर्वोच्च नेता भियतनाम पुगेका हुन् भने अमेरिकी राष्ट्रपति एअर फोर्स वान विमानबाट मंगलबार अबेर हनोई पुगेका हुन् ।

दुई नेताबीच बुधबार संक्षिप्त वार्ता हुनेछ । स्थानीय समयअनुसार बुधबार साँझ अमेरिकी राष्ट्रपति ट्रम्प र उनका दुई सहयोगीहरु तथा उत्तर कोरियाली नेता किम र उनका दुई सहयोगीहरुबीच संक्षिप्त वार्ता हुने अमेरिकी राष्ट्रपति कार्यालय ह्वाइट हाउसले जनाएको छ । संक्षिप्त वार्ता २० देखि २५ मिनेटसम्म हुने बताइएको छ । उनीहरुले बेलुकीको खाना पनि सँगै खानेछन् ।

संक्षिप्त वार्तामा अमेरिकाको तर्फबाट राष्ट्रपति ट्रम्पसहित विशेष विदेशमन्त्री माइक पोम्पेओ तथा ह्वाइट हाउसका चिफ अफ स्टाफ मिक मुल्भनेको सहभागिता हुने जनाइएको छ ।

वार्तामा उत्तर कोरियाली सर्वोच्च नेता किमसहित किमकी बहिनी किम यो जोङ तथा उत्तर कोरियाली विशेष प्रतिनिधि किम योङ चोल सहभागि हुनेछन् ।आज हुने संक्षिप्त वार्तापछि भोलि दुबै नेताबीच अर्को चरणको वार्ता हुने जनाइएको छ ।

त्यसबाहेक उत्तर कोरियाली सर्वोच्च नेता तथा अमेरिकी राष्ट्रपति दुबैले भियतनामी उच्चस्तरीय नेता तथा अधिकारीसँग छुट्टाछुट्टै भेटवार्ता गर्ने कार्यक्रम छ ।