काठमाडौं– डिउटीमा खटिएका प्रहरीलाई प्रलोभनमा पार्नका लागि घुस दिन खोज्ने २ जना पक्राउ परेका छन् ।

काठमाडौं महानगरपालिका–३१ ठूलो खरिबोट चोकमा डिउटीमा खटिएको प्रहरीलाई २ हजार रुपैयाँ घुस दिन खोज्ने २ जना पक्राउ परेका हुन् ।

पक्राउ पर्नेमा काभ्र घर भइ काठमाडौंको सिनामंगल बस्ने २८ वर्षी मनोज तिमल्सिना र भारतको मोतिहारी घर भइ काठमाडौंको सिनामंगल नै बस्ने २३ वर्षीय अरुण कुमार जैसवाल छन् ।

महानगरीय प्रहरी बृत्त बानेश्वरकाट खटिएको प्रहरी टोलीले बा ६० प ४१६८ नम्बरको मोटरसाइकल जाँच गर्ने क्रममा तिमल्सिना र जैसवाललाई मदिरा सेवन गरेको फेला पारेको थियो ।

मापसे गरेर सवारी चलाएको कसुरमा कारबाही गर्ने क्रममा उनीहरुले प्रहरीलाई प्रलोभनमा पार्न २ हजार रुपैयाँ दिएका थिए ।

प्रहरीले घुस दिन खोजेको २ हजार रुपैयाँ र मोटरसाइकलसहित दुवै जनालाई नियन्त्रणमा लिएको हो ।