महेन्द्रनगर– अख्तियार दुरुपयोग अनुसन्धान आयोगले जलस्रोत तथा सिंचाई विकास डिभिजन कार्यालय महेन्द्रनगर कञ्चनपुरका कार्यालय प्रमुख डिभिजनल इञ्जिनियर अजित कुमार श्रीवास्तव र इन्जिनियर ग्रीष्मा ठगुन्ना घुस रकम सहित पक्राउ गरेको छ ।

जलस्रोत तथा सिंचाई विकास डिभिजनल कार्यालय महेन्द्रनगर कञ्चनपुरका कार्यालय प्रमुख डिभिजनल इञ्जिनियर अजित कुमार श्रीवास्तव र इन्जिनियर ग्रीष्मा ठगुन्नाले निर्माण सम्पन्न भइसकेको चौधर नदी नियन्त्रण योजनाको उपभोक्ता समितिको रनिङ बिल फर–फारक गराई दिने प्रयोजनको लागि भनी सेवाग्राहीसँग घुस मागेका थिए ।

सेवाग्राहीसँग घुस मागेको सूचना एवं उजुरीको आधारमा अख्तियार दुरुपयोग अनुसन्धान आयोगको कार्यालय कञ्चनपुरबाट खटिई गएको टोलीले कार्यालय प्रमुख इन्जिनियर अजित कुमार श्रीवास्तव र इन्जिनियर ग्रीष्मा ठगुन्नालाई सेवाग्राहीसँग रू. दुई लाख रुपैयाँ घुसबापतको रकम लिइसकेको अवस्थामा घुस रकम सहित कार्यकक्षबाट रङ्गेहात नियन्त्रणमा लिएको जनाएको छ ।

उनीमाथि थप अनुसन्धान भइरहेको अख्तियारले जनाएको छ ।

अख्तियारले नियन्त्रणमा लिएपछि सेवाग्राहीले प्रमुख श्रीवास्तवलाई कालोमोसो दलेका थिए ।