भारत– भारतका चिकित्सकहरुले ४ घण्टा लामो शल्यक्रिया पछि एकजना बिरामीको पेटबाट चम्चा, स्क्रु ड्राइभर, दाँत माझ्ने ब्रस, चक्कु र ढोकाको चुकुल निकालेका छन् ।

भारतको हिमाञ्चल प्रदेशको मण्डी जिल्लास्थित लालबहादुर शास्त्री सरकारी मेडिकल कलेजका डाक्टरहरुले मानसिक सन्तुलन गुमाएका एकजनाको पेटबाट ती सामानहरु बाहिर निकालेका हुन् ।

मानसिक सन्तुलन गुमाएका बिरामी २५ वर्षे करण सेन रहेको बताइएको छ । उनले केही समयअघि बेस्सरी पेट दुखेको गुनासो गरेका थिए । उनको पेटमा मासु पलाएको हुनसक्ने भन्दै चिकित्सकहरुले गरेको एक्स रे तथा रेडियोग्राफी परीक्षणबाट बाहिरी सामानहरु उनको पेटमा रहेको फेला पारेका थिए ।

बिरामीले विगत २० वर्षअघि मानसिक सन्तुलन गुमाएको पारिवारिक श्रोतलाई उद्धृत गर्दै भारतीय सञ्चारमाध्यमले जनाएका छन् ।

उनी हाल खतरामुक्त रहेको मेडिकल कलेजले जनाएको छ । उनको पेटबाट ८ वटा चम्चा, दुई स्क्रु ड्राइभर, दुई दाँत माझ्ने ब्रस, एउटा भान्सामा प्रयोग हुने चक्कु, र ढोकाको एउटा चुकुल फेला परेको थिया ।

त्यस मेडिकल कलेजमा यस्तो किसिमको शल्यक्रिया पहिलोपटक भएको अस्पतालले जनाएको छ ।