काठमाडौं– क्रोएसियामा हुने आईएसएफ वर्ल्ड स्कूल च्याम्पियनसिप भलिबल यु—१५ खेल्ने नेपाली गल्र्स टोलीको बिदाई गरिएको छ । नेपाल कम्युनिस्ट पार्टी (नेकपा) नेता नारायणकाजी श्रेष्ठको उपस्थितीमा क्रोएसिया जाने ९ खेलाडीसहित १४ सदस्यीय टोलीको बिदाइ गरिएको हो ।

नेपाल स्कूल स्पोर्टस् फेडेरेसनको सहकार्यमा नेपाली टोली क्रोएसिया जान लागेको हो । प्रतियोगिता क्रोएसियाको पारेसमा मार्च ३० देखि अप्रिल ४ सम्म सञ्चालन हुनेछ । गर्ल्स च्याम्पियनसिपमा निश्चित उमेर समूह भनेर तोकिएका कारण टोलीमा सबैजसो नयाँ खेलाडी रहेको प्रशिक्षक कुमार राईले बताए ।

२०१६ मा आईएसएफको सदस्य बनेको नेपाल पहिलो पटक प्रतियोगितामा सहभागिता जनाउन लागेको अध्यक्ष विनोद श्रेष्ठले बताए ।
यस्तै, बिदाई कार्यक्रममा बोल्दै नेकपा प्रवक्ता श्रेष्ठले देशको गौरव हुने गरी खेलेर आउन खेलाडीलाई सुभकामना दिदै खेलाडीहरुले खेलबाटै जीविको चलाउने वातावरण बन्दै गएको बताए ।

यस्तै, नेपाली टोलीकी कप्तान सजिना श्रेष्ठले विदेशमा खेल्न जान पाउँदा एकदमै खुशी लागेको बताएकी छन् । उनले अहिलेसम्म यस्तो प्रतियोगितामा सहभागिता जनाउन नपाएको बतनाउँदै यसले आफ्नो खेलमा सुधार ल्याउने बताइन् ।

उनले भनिन् ‘हामी देशको प्रतिनिधित्व गरेर क्रोएसिया जाँदैछौं । पहिलो पटक भएकोले नयाँ ठाउँमा कस्तो हुन्छ थाहा छैन् । तर हाम्रो लक्ष्य त्यहाँ गएर राम्रो खेल्ने हो र सकेसम्म जितेर आउने हो ।’

क्रोएसिया जाने १४ सदस्यीय नेपाली टोली

खेलाडी : सोनी थपलिया, करिना सुनुवार, सविना तामाङ, दिया परियार, जोया गुरुङ, सजिना श्रेष्ठ (कप्तान), रिया कुवँर, प्रेक्षा राई, सुनिता खड्का छन् ।
हेड अफ डेलिगेसन : राज कुमार कार्की
प्रशिक्षक : कुमार राई
स्कूल शिक्षक : सुनकेशरी माली
रेफ्री : चन्द्रा बदना राई
स्कूल डाइरेक्टर : मोहन कुमार कार्की