काठमाडौं–

काठमाडौंको भृकुटीमण्डपस्थित फनपार्कको प्रयोगमा रहेको जग्गा भाडामा लगाउँदा भ्रष्टाचार गरेको आरोप लागेका पूर्वमन्त्री बद्री न्यौपाने ५ लाख रुपैयाँ धरौटीमा रिहा भएका छन् ।

विशेष अदालतका अध्यक्ष बाबुराम रेग्मी तथा न्यायाधीशहरु द्वारिकामान जोशी र प्रमोदकुमार वैद्यको इजलाशले न्यौपानेलाई ५ लाख धरौटीमा रिहा गर्न आदेश जारी गरेको हो ।

आदेशसँगै ५ लाख रुपैयाँ नगद बुझाएर न्यौपाने रिहा भइसकेका विशेष अदालतका उपरजिष्ट्रार पुष्पराज पाण्डेयले जानकारी दिए ।

तत्कालीन महिला बालबालिका तथा समाज कल्याण मन्त्री रहेका न्यौपानेविरुद्ध ३१ करोड ५२ लाख १७ हजार ६ सय ७५ रुपैयाँ बिगो तथा जरिवाना दावी गर्दै अभियोग पत्र दायर गरेको थियो ।

समाज कल्याण परिषदले काठमाडौंको भृकुटीमण्डपस्थित फनपार्क मेला क्षेत्र रहेको ६० रोपनी जग्गा भाडामा लगाउँदा प्रचलित मापण्ड र प्रक्रिया विपरित गरी अनियमितता गरेको दावी गरेको छ ।

फनपार्कको जग्गालाई वद्नियतपूर्वक प्रतिरोपनी ९ हजार २ सय ५० रुपैयाँमा मात्रै भाडामा लगाइएको भन्दै पूर्वमन्त्री न्यौपानेसहित १४ जनाविरुद्ध गत माघ २१ गते विशेष अदालतमा मुद्दा दायर गरेको थियो ।