हेटौंडा– मकवानपुरमा टाटा सुमो दुर्घटना हुँदा ज्यान गुमाउनेको संख्या ५ पुगेको छ ।

रौतहटको चन्द्रपुरबाट काठमाडौं जाँदै गरेको ना १ ज ३४३३ नम्बरको टाटा सुमो हेटौंडा–काठमाडौं मार्गअन्तर्गत इन्द्रसरोवर गाउँपालिका–३ मा दुर्घटना हुँदा ३ जनाको घटनास्थलमै मृत्यु थियो ।

जिल्ला प्रहरी कार्यालयका अनुसार थप २ जनाको उपचारका लागि काठमाडौं लैजाने क्रममा बाटोमै ज्यान गएको हो ।

दुर्घटनामा ज्यान गुमाउनेमध्ये अहिलेसम्म २ जनाको मात्रै पहिचान खुलेको छ । प्रहरीका अनुसार सुमो दुर्घटनामा ज्यान गुमाउनेमा रौतहटको चन्द्रपुर नगरपालिका–९ का २१ वर्षीय मनिस विक र उनकी श्रीमती २० वर्षीया सिर्जना विक छन् ।

दुर्घटनामा अहिलेसम्म ३ पुरुष र २ महिला गरी ५ जनाको मृत्यु भएकोमा १ महिला र २ पुरुषको पहिचान खुल्न बाँकी रहेको प्रहरीले जनाएको छ ।

दुर्घटनामा ४ जना घाइते भएकामा २ जनाको काठमाडौंको बल्खुस्थित बयोधा र २ जनाको भैंसीपाटीस्थित मेडिसिटी हस्पिटलमा उपचार भइरहेको प्रहरीले जनाएको छ ।