इनर्वा– आफ्नै महिला अनुयायीमाथि जबरजस्ती करणी (बलात्कार) गरेको अभियोग लागेका सिद्धबाबा भनिने कृष्णदास गिरीले अदालतमा इन्कारी बयान गरेका छन् ।
प्रहरीको अनुसन्धानपछि बिहीबार जिल्ला सरकारी वकिल कार्यालयले अभियोग पत्र दायर गरेपछि शुक्रबार जिल्ला अदालत सुनसरीमा कृष्णदासको बयान लिइएको थियो ।
अदालती बयानका क्रममा उनले आफूमाथि झुटो आरोप लगाइएको बताएका छन् ।
बयानका क्रममा पीडित महिलासँग उनले गरेको संवादसहित अडियो समेत प्रस्तुत गरिएको थियो । जुन अडियोमा कृष्णदासले पीडित महिलासँग क्षमायाचना गर्दै आफूबाट गल्ती भएको स्वीकार गरेको सुनिन्छ ।
अदालती बयानका क्रममा भने कृष्णदासले उक्त अडियोमा कसैले आफ्नो आवाज नक्कल गरेर ती कुराहरु बोलेको बताएका छन्।
प्रहरीसँगको साविती बयानमा पनि कृष्णदासले आफूमाथिको आरोप अस्वीकार गरेका थिए ।
जिल्ला अदालत सुनसरीका प्रवक्ता गोपाल प्रसाद गिरीका अनुसार शुक्रबार कृष्णदासको बयान सकिएको छ ।
शुक्रबार जिल्ला अदालत सुनसरीका प्रमुख न्यायाधीश राधाकृष्ण उप्रेतीको इजलाशमा कृष्णदासको बयान लिइएको थियो ।
अब आइतबार कृष्णदासको थुनछेक हुने अदालतले जनाएको छ । कृष्णदासको थुनछेक बहसमा वकालत गर्नका लागि अहिलेसम्म १० जना वकिलहरुले आफ्नो वकालतनामा दर्ता गराएका जिल्ला अदालत सुनसरीका प्रवक्ता गिरीले खबरहबलाई जानकारी दिए ।
वकालतनामा दर्ता गराउनेमध्ये ६ जना सरकारी वकिल छन् भने ४ जना कृष्णदासको तर्फबाट कानून व्यवसायीहरु छन् ।
जिल्ला सरकारी वकिल कार्यालयले गिरीविरुद्ध फौजदारी अपराध संहिताको दफा २१९ को उपदफा (३) को देहाय (ङ) बमोजिम अधिकत्तम १० वर्ष कैद सजाय मागदाबी गरेको छ ।
अपराध संहिताको दफा २१९ को उपदफा (३) को देहाय (ङ) मा १८ वर्ष वा १८ वर्षभन्दा बढी उमेरकी महिलालाई जबरजस्ती करणी गरेको प्रमाणित भएमा ७ वर्षदेखि १० वर्षसम्म कैद सजाय हुने व्यवस्था छ ।
गिरीविरुद्ध उनकै एक महिला अनुयायीले बलात्कार आरोप लगाएकी थिइन् । पीडित महिलाले प्रहरीमा उजुरी दिएपछि गिरी भने आफू बिरामी भएको भन्दै विराटनगरस्थित एउटा अस्पतालमा भर्ना भएका थिए ।
प्रहरीले गत मंसिर १८ गते गिरीलाई अस्पतालबाटै पक्राउ गरेको थियो । प्रहरीले पक्राउ गरेपछि पनि गिरी भने अस्पतालमै बस्दै आएका थिए ।
चिकित्सकहरुले उनलाई मुटुसम्बन्धी रोगको समस्या रहेको बताउँदै आएका छन् । तर, पीडित पक्षले भने गिरीले घटनालाई प्रभावित पार्न अस्पतालमा बसेर विभिन्न प्रकारका चलखेल गरिरहेको आरोप लगाएका छन् ।
प्रतिक्रिया