काठमाडौं- नेकपाका अध्यक्षसमेत रहेका प्रधानमन्त्री केपी शर्मा ओलीलाई भेट्न नेकपाका अर्का अध्यक्ष पुष्पकमल दाहाल प्रचण्ड बालुवाटार पुगेका छन् ।

चितवनबाट काठमाडौं आएलगत्तै प्रचण्ड ओलीलाई भेट्न बालुवाटार पुगेका हुन् । सत्तारुढ दल नेकपाका दुई अध्यक्षबीचको भेटमा सभामुख चयनबारे छलफल हुनेछ ।

संसदको ठूलो दल नेकपाले सभामुखबारे निर्णय लिन नसक्दा संसदको कारवाही समेत प्रभावित भएको छ । संसदको शुक्रवारको बैठकले सभामुख निर्वाचनको कार्यतालिका पारित गर्ने कार्यसूची रहेपनि ‘विशेष कारण’ देखाउँदै सूचना टाँस गरेर बैठक स्थगित भएको छ ।

नेकपाले सभामुखका उम्मेदवारबारे टुंगो लगाउन नसक्दा संसदको प्रक्रिया नै अवरुद्ध भएको देखिएको छ । सभामुखमा नेकपाले उम्मेदवारी दिन उपसभामुख डा. शिवमाया तुम्बाहाम्फेले समेत राजीनामा दिनुपर्ने चर्चा पार्टीभित्र छ तर शिवमायाले समेत राजीनामा दिएकी छैनन् ।

नेकपामा सभामुखका लागि सुवासचन्द्र नेम्वाङ, अग्नी सापकोटा र तुम्बाहाम्फेको नाम चर्चामा छ ।