काठमाडौं– इंग्लिस क्लब टोटेनहम च्याम्पियन्स लिग फुटबलको नकआउट चरणमा प्रवेश गरेको छ । मंगलबार राति भएको खेलमा ग्रिसको ओलम्पियाकोसलाई ४–२ गोल अन्तरले पराजित गर्दै टोटेनहम नकआउट चरण प्रवेश गरेको हो ।

खेलमा २–० ले पछाडी परेको स्थितिलाई उल्ट्याउँदै टोटेनहमले जित हासिल गरेको हो । खेलमा अग्रता पाहुना टोलीले छैटौं मिनेटमा अल अरबीको गोलबाट लिएको थियो । १९ औ मिनेटमा बोर्गेस सेमेदोले गोल गर्दै ओलम्पियाकोसलाई २–० को अग्रता दिलाए ।

खेलको पहिलो हाफको ईन्जुरी समयमा गोल गर्दै डेली अलीले टोटेनहमका लागि पहिलो गोल गर । ५० औ मिनेटमा केनले घरेलु टोलीका लागि बराबरी गोल गरेका थिए ।

सर्ज औरिएरले ७३ औ मिनेटमा गोल गर्दै टोटेनहमलाई ३–२ को अग्रता दिलाए । केनले ७७ औ मिनेटमा व्यक्तिगत दोस्रो गोल गर्दै टोटेनहमको जित सुनिश्चित गरेका थिए ।

समूह बीको दोस्रो स्थानको टोटेनहमले ५ खेलबाट १० अंक जोड्यो । ओलम्पियाकोस १ अंक सहित तालिकाको पुछारमा रह्यो । शीर्ष क्लब बार्यन म्युनिख यसअघिनै नकआउट चरण प्रवेश गरिसकेको छ ।