काठमाडौं– वीरगञ्ज महानगरपालिका कार्यालयको वारुण यन्त्र शाखामा कार्यरत अग्नि नियन्त्रक बुनिलाल चौरसियाको गोली हानी हत्या गरिएको अवस्थामा शव फेला परेको छ ।

गत बिहीबार साँझ घरबाट निस्किएका उनको शव माइधीया पोखरीको किनारमा प्लास्टिक र कपडामा बेरेर फालिएको अवस्थामा आज (शनिबार) फेला परेको हो ।

उनको शरीरका विभिन्न ठाउँमा गोली लागेको देखिएको छ । शवको पोष्टमार्टम नारायणी अस्पतालमा भएको छ ।

पोष्टमार्टममा संलग्न चिकित्सकका अनुसार उनको टाउको र छातीमा २–२ र नाइटोमा १ गरी पाँच गोली लागेको छ ।चौरसियाको हत्या व्यवसायिक समूहबाट भएको प्रहरीको प्रारम्भिक अनुसन्धानबाट खुलेको छ ।

बिहीबार राति स्थानीय दीपककिशोर अग्रवालको घरमा गएका उनी त्यसपछि सम्पर्कविहीन भएको बताइएको छ ।

पर्सा प्रहरी प्रमुख एसपी सोमेन्द्रसिंह राठौरले चौरसियाको हत्या आर्थिक लेनदेन र व्यक्तिगत सम्बन्ध हुनसक्ने प्रारम्भिक अनुसन्धानमा देखिएको जानकारी दिएका छन् ।

प्रहरीले दीपक र उनकी श्रीमती निधि अग्रवाललाई नियन्त्रणमा लिएर अनुसन्धान गरिरहेको छ ।