एजेन्सी– भारतको भारी वर्षासँगै आएको बाढी तथा भवन भत्किदा १७ जनाको ज्यान गएको छ ।

महाराष्ट्रका पुणे तथा जलगाउँमा भारी वर्षा र भवन भत्किदा १२ जनाको ज्यान गएको हो । यस्तै जलगाउँमा चट्याङ लाग्दा एकै परिवारका चारसहित पाँच जनाको मृत्यु भएको छ ।

भीषण वर्षाका कारण पुणेमा डुबान भएको छ । बारामतीस्थित नारदा ड्यामको ढोका खोल्दा आएको बाढीका कारण डुबान भएको भारतीय अधिकारीहरुले बताएका छन् । उक्त क्षेत्रका २८ हजार मानिसलाई सुरक्षित स्थानमा सारिएको छ ।

मौसम विभागले भारी वर्षाको चेतावनी दिएको छ । डुबान क्षेत्रका विद्यालय तथा कलेजहरु बन्द गरिएको छ । यसका साथै विद्युत आपुर्ति पनि बन्द भएको छ ।

यसैबीच, पुणेको खेंड–शिवपुर गाउँमा बाढीले पाँच जनालाई बगाएको छ । यस्तै पुरन्दर क्षेत्रमा दुई युवकलाई बाढीले बेपत्ता बनाएको छ ।
यसअघि गत जुनमा पुणेको कोंडवा क्षेत्रमा पर्खाल ढल्दा १५ जनाको मृत्यु भएको थियो ।