काठमाडौं– १३ औं दक्षिण एसियाली खेलकुदका लागि तयार भइरहेको पोखरा रंगशालामा ब्रहमुडा घाँस लाउने काम शुरु भएको छ ।

बिहीबार पहिलो लटमा आएको १५ हजार स्क्वायर फिट घाँस हाल्ने काम शुरु भएको हो। ११/१२ दिनमा घाँस लाउने काम सकिने इन्जिनियर प्रनिस ताम्राकारले बताएका छन् ।

मैदान पुरै हरियो हुनभने एक महिना भन्दा बढी समय लाग्ने ताम्राकारले बताए । पोखरा फुटबल मैदानमा साग अन्तरगतको महिला टोलीको खेल हुने बताइएको छ ।

१३ औं साग मंसिर १५-२४ गतेसम्म हुने मिति तोकिएको छ। यस्तै, मैदानका लागि आवश्यक ब्रहमुडा घाँस भारतको कोलकाताबाट ल्याइँदै छ ।

यसअघि बैशाखमा नेपालगन्जमा सम्पन्न ८ औं राष्ट्रिय खेलका लागि पनि भारतबाट ब्रहमुडा घाँस ल्याइएको थियो ।