हेटौंडा– काठमाडौंबाट धरानतर्फ जाँदै गरेको बसमा यात्रारत एक युवती लागू औषध चरेशसहित पक्राउ परेकी छन् ।

काठमाडौंबाट धरानतर्फ जाँदै गरेको बा ४ ख ८०६० नम्बरको रात्री बस चेकजाँचका क्रममा ८ किलो १ सय ६० ग्राम चरेशसहित २४ वर्षीया गिता राई पक्राउ परेकी हुन् ।

पर्साको पटेर्वा घर भएकी राईले आफूले बोकेको झोलामा प्लास्टिकले बेरेर ८ पोका चरेश राखेको अवस्थामा फेला परेको मकवानपुर प्रहरीले जनाएको छ ।

पछिल्लो समय यात्रु बसमा समेत चरेश तस्करी हुने गरेको सूचनाका आधारमा जिल्ला प्रहरी कार्यालयबाट खटिएको प्रहरी टोलीले हेटौंडामा उक्त बसमाथि चेकजाँच गरेको थियो ।

चेकजाँचका क्रममा २४ वर्षीया राईको झोलामा चरेश फेला परेको जिल्ला प्रहरी कार्यालय मकवानपुरले जनाएको छ ।

पक्राउ परेकी राईमाथि लागू औषध नियन्त्रण ऐन, २०३३ अन्तर्गत कारबाही प्रक्रिया अगाडि बढाइएको प्रहरीले जनाएको छ ।