नयाँ दिल्ली– भारत सरकारले पूर्व प्रधानमन्त्री मनमोहन सिंहलाई प्रदान गर्दै आएको सबैभन्दा उच्च सुरक्षा व्यवस्था फिर्ता लिएको छ ।

विभिन्न सुरक्षा निकायहरुबाट पूर्व प्रधानमन्त्री सिंहमाथि रहेको सम्भावित सुरक्षा चुनौतिको विश्लेषण पछि उनको सबैभन्दा उच्च सुरक्षा व्यवस्था स्पेशल प्रोटेक्सन ग्रुप एसपीजी फिर्ता लिइएको भारतीय सञ्चारमाध्यमले जनाएका छन् ।

सन् २००४ देखि सन् २०१४ सम्म भारतीय प्रधानमन्त्रीको जिम्मेवारी सम्हालेका सिंहलाई प्रदान गरिएको सुरक्षा व्यवस्था विभिन्न सुरक्षा निकायसँग तीन महिनासम्म समिक्षा गरेपछि फिर्ता लिइएको हो ।

यद्यपि, सिंहलाई सेन्ट्रल आर्मड पुलिस फोर्स सीआरपीएफको जेड–प्लस सुरक्षा व्यवस्था भने उपलब्ध गराइने छ ।

यसअनुसार अब भारतमा प्रधानमन्त्री नरेन्द्र मोदी, काँग्रेस नेतृ सोनिया गान्धी, राहुल गान्धी र प्रियंका गान्धीलाई मात्र एसपीजी सुरक्षा व्यवस्था उपलब्ध छ ।