काठमाडौं– सरकारले त्रिभुवन अन्तर्राष्ट्रि विमानस्थल क्षेत्रको सडक किनारका पसलमा सेकुवा पोल्न नपाइने नियम लागू गर्ने भएको छ ।

संस्कृति, पर्यटन तथा नागरिक उड्डयन मन्त्री योगश भट्टराईले अन्तर्राष्ट्रिय विमानस्थल क्षेत्रमा सेकुवा पोल्न नपाइने नियम लागू गरिने बताएका हुन् ।

सोमबार पत्रकार सम्मेलन गर्दै मन्त्री भट्टराईले गौशालादेखि तीनकुनेसम्मको सडक क्षेत्रलाई ‘अन्तर्राष्ट्रिय विमानस्थल क्षेत्र’ घोषणा गरिने बताए ।

उक्त क्षेत्रमा नराम्रो गन्ध आउने खालका अन्य गतिविधिसँगै खुला रुपमा सेकुवा पोल्न नपाउने व्यवस्था गरिने मन्त्री भट्टराईको भनाइ छ ।

मन्त्री भट्टराईले पाशुपत क्षेत्रमा रहेको विद्युतीय शवदाह गृहमा ५ ओटा नयाँ मेसिन थप गर्ने पनि बताए ।

यस्तै, ज्येष्ठ नागरिकहरुको दर्शनका लागि पशुपतिनाथका ४ ओटै ढोकाबाट सहजै जान सकिने व्यवस्था गरिने पनि मन्त्री भट्टराइले जानकारी दिए ।

७० वर्ष पूरा भएका नागरिकलाई विमानमा ५० प्रतिशत छुट

मन्त्री भट्टराईले ७० वर्ष उमेर पूरा भएका ज्येष्ठ नागरिकलाई हवाई यात्राको भाडामा ५० प्रतिशत छुट दिने व्यवस्था लागू गरिने घोषणा गरे ।

मन्त्री भट्टराईका अनुसार आन्तरिक तर्फको उडानमा ज्येष्ठ नागरिकलाई हवाई भाडामा ५० प्रतिशत छुट दिइने छ ।