मुम्बई – सञ्जय लीला भन्सालीको फिल्म ‘इन्साल्लाह’ निर्माण हुने चर्चासँगै भारतीय दर्शकमाझ प्रतीक्षाको विषय बनेको छ । भन्साली र सलमान खानले २ दशकपछि फेरि एकसाथ काम गर्दैछन् ।

साथै पहिलोपटक सलमान र आलिया भट्ट पनि सलमानको अपोजिटमा देखिनेछन् । लामो समयदेखि चर्चामा रहेको यो फिल्मको अर्को नयाँ खबर बाहिर आएको छ । भारतीय मिडियाका अनुसार यो फिल्मको थियट्रिकल राइटस् १९० करोड भारुमा बिक्री भएको छ ।

सन् २०२० मा रिलिज हुने यो फिल्मको अझै छायांकन थालिएको छ । भन्सालीले थिएटरमा फिल्म देखाउने राइटस् मात्र १६५ करोड भारुमा बेचेका छन् । यस्तै प्रचार र विज्ञापनका लागि भने छुट्टै २५ करोड भारु लिएका छन् । यो फिल्मको डिजिटल राइटसमा पनि महंगो रकममा बिक्री हुने अनुमान गरिएको छ ।

फिल्ममा सलमान खान र आलिया भट्टको शीर्ष भूमिका रहनेछ । सलमान एक व्यवसायीको भूमिकामा हुनेछन् भने आलियाले सङ्घर्षरत कलाकारको भूमिका निभाउने छिन् ।