काठमाडौं – आईसीसी टि–२० विश्वकप क्रिकेट एसिया फाइनलमा सिंगापुरले मलेसियालाई पराजित गरेसँगै नेपाललाई दोस्रो चरण प्रवेशका लागि सहज हुने भएको छ ।

सिंगापुरस्थित इन्डियन एसोसियसन ग्राउण्डमा भएको खेलमा सिंगापुरले मलेसियालाई ८ विकेटले पराजित गरेको हो । यो जितसँगै सिंगापुरले ३ खेलबाट ५ अंक जोडेको छ भने उसले अब नेपालसँगको एक खेल मात्रै बाँकी छ ।

घरेलु टोलीसँग पराजित भएसँगै मलेसिया विश्वकप छनोटबाट बाहिरिएको छ । आजै भएको अर्को खेलमा पराजित भएको कतार पनि छनोटबाट बाहिरिएको छ ।

नेपाली राष्ट्रिय क्रिकेट टोलीले खेलेका २ खेलमा एक खेलमा जीत्दै २ अंक जोडेको छ । अब नेपालले घरेलु टोली सिंगापुर र कुवेतसँग खेल्न बाँकी छ । ३ खेलबाट ३ अंक जोड्न सफल कुवेतसँग नेपाली टोलीले शनिबार प्रतिस्पर्धा गर्दैछ भने छनोटको अन्तिम खेल सिंगापुरसँग आइतबार खेल्नेछ ।

यस्तै, २ टोली प्रतियोगिताबाट बाहिरि रहँदा नेपालले भने बाँकी दुई खेल जीत्नै पर्ने देखिएको छ । २ अंकमात्रै रहेको नेपालले शनिबार कुवेतलाई पराजित गर्न सके ४ अंक जोड्ने छ भने सिंगापुरले ३ खेलबाट ५ अंक जोडिसकेको छ । त्यसैले नेपालले सि‌गापुरलाई उसकै घरेलु मैदानमा स्तब्ध पार्दै आफ्नो ग्लोबल क्वालिफायरको यात्रा तय गर्नु पर्नेछ ।

सिंगापुरमा यतिबेला मौसमी पानी परिरहेकाले मौसम बाधक बन्ने खतराका बीच २ खेलमध्ये एक खेल बर्षाले प्रभावित पारे पनि अर्को खेलमा जीत हात पार्न सके नेपाल रन रेटका आधारमा ग्लोबल क्वालिफायर पुग्नसक्छ ।

यसअघि नेपाल र मलेसियाबीचको खेल बर्षाका कारण ९ ओभरमा घटाइएको थियो । मौसमले असर नगरेर दुवै खेल्न पाए नेपालले दुवै खेल जीत्नै पर्ने हुन्छ । दुवै खेल जीत्न सके नेपालको स्वतः ६ अंक सहित प्रतियोगिताको शीर्ष स्थानमा रहँदै ग्लोबल क्वालिफायरमा पुग्नेछ ।