काठमाडौं– भारतीय गुप्तचर संस्था ‘रअ’ का प्रमुखले प्रधानमन्त्री, विभिन्न दलका नेता र पूर्व राजासँग भेटवार्ता गरेको समाचार केही दिन देखि विभिन्न सञ्चारमाध्यमहरु आइरहका छन् ।

विहीवार सञ्चारमन्त्री गोकुल बाँस्कोटाले प्रधानमन्त्रीले ‘रअ’ प्रमुखलाई नभेटेको बताएका थिए ।

यसैबीच पूर्व राजाका निजी सचिव डा. फणिराज पाठकले पनि पूर्व राजा ज्ञानेन्द्र शाह र रअ प्रमुख बीच भेटघाट भएको भन्ने समाचारप्रति आपत्ति जनाएका छन् ।

सामाजिक सञ्जालमा एक संक्षिप्त विज्ञप्ति राख्दै पाठकले भारतीय गुप्तचर संस्था रअका प्रमुखलाई भेटेको भनी केही अनलाइन पत्रिकामा छापिएका खबर पूर्णतया झुटो भएको बताएका हुन् ।

‘यस्ता कपोलकल्पित, मनगढन्त र राष्ट्रको गरिमा घटाउने समाचारहरूले नेपाल र नेपालीको गर्व र सम्मानमा ठेस लाग्ने भएकोले यस्ता समाचार संप्रेषण गरेर पत्रकारिताको धर्म र समाज प्रतिको दायित्व नबिर्सन अनुरोध गर्दछु ’ पूर्व राजाका सचिब पाठले विज्ञप्तिमा जनाएका छन् ।