काठमाडौं- सामाजिक सञ्जाल फेसबुकको दुरुपयोग गरी सुन्दर युवतीसँग विवाह गराइदिने भन्दै ठगी गरेको आरोपमा प्रहरीले एक महिलालाई पक्राउ गरेको छ ।

दोलखा शैलुङ गाउँपालिका–५ की २३ वर्षीय संगीता भनिने कल्पना बस्नेतलाई ४ लाख ५५ हजार रुपैयाँ ठगी गरेको आरोपमा प्रहरीले टेकुबाट पक्राउ गरेको हो । उनले संगीता बस्नेतको नामबाट फेसबुक आइडी बनाइ दोलखा शैलुङ गाउँपालिका–८ का २४ वर्षीय हरि बहादुर कार्कीलाई ठगेको प्रहरीले जनाएको छ ।

उनले हरिबहादुरलाई सुन्दर युवतीको फोटो पठाई विभिन्न नम्बरबाट फोन समेत गरेर तपाईलाई त्यो केटीले माया गर्छे भन्दै विश्वासमा पारेको र पछि त्यो केटी दुर्घटनामा परी अस्पतालमा उपचार भइरहेकोले उपचार गर्नको लागि रकम पठाई दिनुहोस् भनि पटक–पटक गरी ४ लाख ५५ हजार रुपैयाँ ठगेको आरोप छ ।

महानगरीय प्रहरी अपराध महाशाखा टेकुबाट खटिएको प्रहरीले उनको साथबाट २ थान मोबाइल समेत बरामद गरेको छ । कल्पनालाई ठगी सम्बन्धी कसुरमा आवश्यक कारबाहीको लागि महानगरीय प्रहरी परिसर काठमाडौं पठाइएको छ ।