काठमाडौं- एएफसी कपको अन्तिम खेलमा पनि नेपालको लिग च्याम्पियन टोली मनाङ-मस्याङ्दी क्लब पराजित भएको छ । अखिल नेपाल फुटबल संघ (एन्फा) कम्प्लेक्स सातदोबाटोस्थित मैदानमा भएको खेलमा मनाङलाईं भारतीय क्लब चेन्नाईनले ३-२ गोलले पराजित गरेको हो ।

घरेलु मैदानमा मनाङले पहिलो हाफमा गोलरहित बराबरी खेलेपनि दोस्रो हाफमा ३ गोल खायो । चेन्नाइनले खेलको ५३ औं, ६७ औं र ८९ औं मिनेटमा गोल गर्दै मनाङलाई पराजित गरेको हो ।

चेन्नाइनविरुद्ध मनाङले २ गोल फर्काए पनि जीत हात पार्न भने असफल भयो । जसमा मनाङका फरवार्ड अफिजे ओलाओलेले गोल गरेका थिए ।
उनले खेलको ७२ औं र ७९ औं मिनेटमा गोल गर्दै पाहुना टोलीविरुद्धको २ गोल फर्काएका थिए ।

चेन्नाईनका लागि ५३ औं मिनेटमा मोहम्मद राफिले र ६७ औं मिनेटमा इला साबियाले गोल गरेका थिए भने ८९ औं मिनेटमा टोलीका लागि तेस्रो र व्यक्तिगत दोस्रो गोल गर्दै रफीले चेन्नाइनलाई मनाङविरुद्ध ३-२ को जीत दिलाए ।