सुनसरी– घरमा श्रीमान–श्रीमतीबीच भएको झगडाको विषयलाई सुनसरीमा स्थानीयहरु आन्दोलित बनेका छन् । श्रीमानले श्रीमतीलाई घर निकाला गरेपछि पीडित महिलालाई न्याय दिलाउन माग राख्दै स्थानीयले सुनसरीको गढी गाउँपालिकाको कार्यालय घेराउदेखि सडकमा चक्का जामसम्म गरेका हुन् ।

सोमबार स्थानीयले इनरुवा–दुहवी सडक बन्द गरी गाउँपालिका कार्यालयले घेराऊ गरे । गढी गाउँपालिका घेराउ गर्न पुगेका गढी-६ का स्थानीयहरुले न्यायीक समितिमा ६ महिनादेखि दिएको उजुरीमा पीडित महिलालाई न्याय नदिएको आरोप लगाएका छन् ।

गाउँपालिकाका अध्यक्ष, न्यायीक समिति संयोजक तथा उपाध्यक्ष राजकुमारी चौधरीले उल्टै पीडित महिलामाथि हप्की–दप्की गरी दुःख दिएको स्थानीयको आरोप छ । सप्तरी कञ्चनरुप नगरपालिका वदगामा माइती घर भएकी सिन्कुकुमारी यादव खड्गालाई उनका श्रीमान विरेन्द्र यादवले एक वर्ष अगाडि ससुरालीबाट दाइजो थोरै ल्याएको निहुँमा घर निकाला गरिदिएका थिए ।

श्रीमानले घरबाट निकालेपछि पीडित बनेकी सिन्कुकुमारीले न्यायको लागि गाउँपालिकामा उजुरी दिएकी थिइन् । न्यायका लागि गाउँपालिकाको न्यायीक समितिमा उजुरी दिएकी उनले न्याय पाउने आशामा झण्डै एक वर्ष बिताइन् । गाउँपालिकाले घर र माइती पक्षकालाई झिकाई न्याय दिलाउने आश्वासन दिँदै आएको भएपनि अन्त्यमा गाउँपालिकाका अध्यक्षले पीडित महिलालाई अब यो केश लिएर नआउनु भन्दै माइतीमा गएर बस्नु भनेपछि स्थानीयले पीडित महिलाको न्यायका लागि सडकमा उत्रिएका बताएका छन् ।