काठमाडौं– काठमाडौंको सुकेधारा, घट्टेकुलो र चन्द्रगिरीमा भएको बम विस्फोटमा परी ज्यान गुमाउनेको संख्या ४ पुगेको छ । घटनामा ८ जना घाइते भएका छन् ।

सुकेधारास्थित एक शैलुनमा भएको बम विस्फोटको घटनामा तीन जनाको मृत्यु भएको हो । एक जनाको घटनास्थलमै मृत्यु भएको हो भने अन्य दुई जनाको उपचारका क्रममा ओम अस्पतालमा मृत्यु भएको प्रहरीले जनाएको छ । सुकेधारा विस्फोटमा ज्यान गुमाउनेको पहिचान खुलेको छैन । विस्फोटमा शैलुन सञ्चालक जीवकुमार ठाकुर घाइते भएका छन् ।

त्यसैगरी घट्टेकुलोमा भएको विस्फोटमा अर्का एक जनाको मृत्यु भएको हो । सुकेधारामा बिस्फोट भएकै समयमा घट्टेकुलोमा पनि विस्फोट भएको हो । विस्फोटमा प्रज्वल शाहीको मृत्यु भएको हो भने रविन केसी घाइते भएका छन् । उनको ट्रमा सेन्टरमा उपचार भइरहेको छ । केसी विप्लव समूहसम्वद्ध विद्यार्थी संगठनको त्रिचन्द्र कलेजका इकाई अध्यक्ष भएको जनाइएको छ ।

काठमाडौंका विभिन्न ठाउँमा भएको विस्फोटमा प्रतिबन्धित नेकपा विप्लव समूहको संलग्नतामा रहेको प्रहरीले जनाएको छ । सवै ठाउँमा भएको विस्फोटको प्रकृति उस्तै प्रकारको भएको समेत प्रहरीले जनाएको छ ।

विस्फोट भएको स्थानबाट प्रहरीले विप्लव नेतृत्वको पर्चा समेत भेटेको छ । त्यस्तै अपरान्ह काठमाडौंको कोटेश्वरबाट पनि प्रहरीले ७ जना विप्लव नेकपाका कार्यकर्तालाई नियन्त्रणमा लिएको छ ।

उनीहरुको साथबाट ४ वटा प्रेसर कुकर र पर्चा बरामद गरेको जनाएको छ ।  विप्लव समूहले सोमबार नेपाल बन्द आह्वान गरेका कारण विभिन्न स्थानमा बम राखेर त्रास मच्चाएको प्रहरीको दाबी छ ।