काठमाडौं– प्रमुख प्रतिपक्षी दल नेपाली कांग्रेसले राजधानीका विभिन्न स्थानमा भएका बम विष्फोट तथा हिंसा प्रति गम्भीर बन्न आग्रह गरेको छ ।

पार्टीका प्रवक्ता विश्वप्रकाश शर्माले आइतबार विज्ञप्ति जारी गर्दै काठमाडौँका विभिन्न स्थानमा भएका बम विष्फोट र त्यसबाट भएको मानवीय क्षतिप्रति नेपाली कांग्रेसको ध्यानाकर्षण भएको जनाएका हुन् ।

नेपाली जनताको लामो संघर्षबाट प्राप्त उपलब्धीहरुको रक्षा र विकासका लागि सबै शक्ति एक भई अघि बढ्नुपर्ने बेलामा भएका यस्ता घटनाप्रति नेपाली कांग्रेसले दुःख व्यक्त गरेको गरेको छ । कांग्रेसले लामो हिंसाबाट जर्जर भएर शान्तिको सास फेरिरहेको नेपालमा पछिल्ला घटनाक्रमहरुबाट कुनै पक्षको पनि विजय नहुने विषयप्रति गम्भीर बन्न राज्य र विद्रोही पक्ष दुवैलाई सचेत हुन समेत आग्रह गरेको हो ।

घटनामा जीवन गुमाएका सबैको आत्माको चिर शान्ति कामना गर्दै नेपाली कांग्रेसले घाइतेहरुको शीघ्र स्वास्थ्य लाभको कामना गरेको छ । कांग्रेसले घाइतेहरुको उपचार खर्च व्यहोर्न सरकारलाई आग्रह समेत गरेको छ ।