काठमाडौं– सगरमाथाको आरोहण गरेर फर्किएका तीन जनालाई प्रहरीले नियन्त्रणमा लिएको छ । सगरमाथाको ढुंगा बिनाअनुमति ल्याउँदा उनीहरुलाई प्रहरीले पक्राउ गरेको हो ।

राष्ट्रिय निकुञ्जका कुनै पनि वस्तु बिनाअनुमति कसैले लैजान पाउँदैन । यस्तै संवेदनशील क्षेत्र सगरमाथा राष्ट्रिय निकुञ्जबाट केही आरोहीले ढुङ्गा बोकेर ल्याउँदा अहिले उनीहरु कानूनी झमेलामा परेका हुन्। हुन त उनीहरुले चिनोका लागि भनेर ढुङ्गा ल्याइएको भएपनि कानूनको अनभिज्ञता क्षम्य हुँदैन । कानून जानेको छैन भन्दैमा उसलाई सजायमा छुट नहुने प्रहरीको भनाइ छ ।

सगरमाथाको ढुंगा ल्याउँदा पक्राउ पर्नेमा ४० वर्षीय पेम्बा शेर्पा, ३० वर्षीय पुर्वा शेर्पा र अमेरिकी नागरिक सोफिया हेलर रहेको त्रिभुवन अन्तर्राष्ट्रिय विमानस्थल प्रहरीले जनाएको छ । उनीहरुलाई सानो आकारका १२ वटा ढुङ्गा र झण्डै एक किलोको अर्को ढुङ्गा ल्याएका थिए । सोलुखुम्बुबाट आएको सूचनाका आधारमा विमानस्थल प्रहरीले खानतलासी गर्दा उनीहरुको साथबाट ढुङ्गा बरामद गरेको हो ।

वन क्षेत्रको विषय भएकाले आवश्यक अनुसन्धान र कारबाहीका लागि डिभिजन वन कार्यालय काठमाडौँलाई बुझाइएको विमानस्थल सुरक्षा कार्यालयका वरिष्ठ प्रहरी उपरीक्षक सन्दीप भण्डारीले जानकारी दिए । कार्यालयका डिभिजनल वन अधिकृत रामबाबु पौडेलले संरक्षित क्षेत्रबाट बिनाअनुमति कुनै पनि वस्तुहरु निकासी गर्न नपाइने बताए । यस्तो भएमा राष्ट्रिय निकुञ्ज तथा वन्यजन्तु संरक्षण ऐनअनुसार कारबाही हुने बताए ।