काठमाडौं – मुलपानी क्रिकेट मैदानमा भएको प्रधानमन्त्री कप क्रिकेट प्रतियोगिताको पहिलो खेलमा विभागीय टोली नेपाल पुलिस क्लबले जीत हात पारेको छ ।

मुलपानी क्रिकेट मैदानमा ‘म्याट’ पीचमा खेलाइएको खेलमा पुलिसले कर्णाली प्रदेशलाई ९४ रनले पराजित गरेको हो ।

टस जितेर पहिलो ब्याटिङ गरेको नेपाल पुलिस क्लबले दिएको १ सय ८६ रनको लक्ष्य पाएको कणार्ली प्रदेशले २७ ओभरमा सबै विकेट गुमाएर ९१ रन मात्रै बनाउन सक्यो ।

कणार्लीलाई ९१ रनमा समेट्न आसिफ शेख र ललित नारायण राजवंशीले उत्कृष्ट बलिङ गरे । कर्णालीका लागि सुशान्त थापाले २९ रन बनाएका थिए भने महेश खत्र्रीले १७ रन बनाउँदा दिनेश अधिकारीले १६ रन जोडेका थिए ।

कर्णालीविरुद्ध आसिफले १० ओभर बलिङ गर्दै २० रन खर्चेर ४ विकेट लिए । त्यस्तै, ललितले ३ ओभर बलिङ गरेर ७ रन खर्चेर ३ विकेट लिए भने सागर ढकाल, पवन शरार्फ र दीपेन्द्रसिंह ऐरीले समान एक–एक विकेट लिए ।

यसअघि पहिलो ब्याटिङ गरेको पुलिस क्लबका लागि दिलीप नाथ र कुसल भुर्तेलले अर्धशतक प्रहार गरे । जसमा दीलिपले ७२ रन र कुसलले ६२ रन बनाएका थिए ।

पुलिसविरुद्ध कर्णालीका सुदन पोखरेलले ५ विकेट लिए भने दीवानले २ विकेट लिँदा कप्तान रविन्द्र शाही र दिनेश अधिकारीले समान एक–एक विकेट लिए ।

जीतसँगै पलिसले अंक तालिकामा २ अंक पाएको छ ।