जापान– अमेरिकी राष्ट्रपति डोनाल्ड ट्रम्पले उत्तर कोरियाली हतियार परीक्षणबाट आफू विचलित नभएको टिप्पणी गरेका छन् ।

राष्ट्रपति ट्रम्पले ट्विट गर्दै ‘उत्तर कोरियाले केही साना रकेट प्रक्षेपण गर्दैमा’ आफू विचलित नहुने जनाएका हुन् । हाल जापान भ्रमणमा रहेका उनले ट्विटमा उत्तर कोरियाली नेता किम जोङ उनले आफूसँग गरेको बाचा कायम राख्नेमा समेत आफू विश्वस्त रहेको जनाए ।

उनले ट्विटमा उत्तर कोरियाको रकेट परिक्षणबाट आफ्ना केही मानिसहरुलाई विचलित बनाएपनि सर्वोच्च नेता किमले आफूसँग गरेको बाचा कायम राख्नेमा आफू विश्वस्त रहेको टिप्पणी गरेका छन् ।

जापान भ्रमणका क्रममा ट्रम्पले त्यहाँका प्रधानमन्त्री सिन्जो आबेसँग उत्तर कोरियाली गतिविधिबारे समेत छलफल गर्ने अन्तर्राष्ट्रिय सञ्चारमाध्यमले जनाएका छन् । केही साताअघि उत्तर कोरियाले दुई रकेट परीक्षण गरेको थियो । अमेरिकी राष्ट्रिय सुरक्षा सल्लाहकार जोन बोल्टनले शनिबार ती परिक्षणले संयुक्त राष्ट्रसंघ सुरक्षा परिषदको प्रस्ताव उल्लङ्घन गरेको टिप्पणी गरेका थिए ।