दाङ– दाङमा सिकलसेल एनिमियाको औषधि अभाव भएको छ ।

औषधि अभाव भएपनि सिकलसेलका बिरामीहरु मर्कामा परेका छन् । ६ महिनादेखि औषधि नपाएको दाङका तुलसीपुरका सिकलसेल एनिमियापीडित जीत बहादुर चौधरीले बताए ।

उनले भने, ‘५–६ महिना भयो हामीले औषधि पाएका छैनौं, यहाँ औषधि नपाउँदा भारत जानुपर्ने बाध्यता छ ।’

सरकारले राप्ती स्वास्थ्य विज्ञान प्रतिष्ठानलाई सिकलसेलका बिरामीलाई एक लाख बराबरको औषधि निःशुल्कक वितरण गर्न निर्देशन दिएको थियो । तर अस्पतालमा नै औषधि अभाव भएपनि विपन्न वर्गका बिरामीहरु महिनौदेखि औषधि नै नखाइ बसेका छन् ।

औषधि नखाँदा बिरामीहरुमा हातखुट्टाका जोर्नी दुख्ने, शरीर दुख्ने हुँदा कुनै पनि काम गर्न नसक्ने अवस्थमा पुगेका छन् ।  दाङका सिकलसेल एनिमियाका बिरामीले ‘फोलिकएसिड’ नियमित खाइरहेको भए पनि ‘हाइड्रिया’ औषधि खान नपाएका हुन् ।

दाङमा ‘फोलिकएसिड’ भए पनि ‘हाइड्रिया’ नामक औषधि अभाव रहेको राप्ती स्वास्थ्य विज्ञान प्रतिष्ठानकी चित्रकला अधिकारीले बताए । उनले भने, ‘सिकलसेल एनिमिया रोगीले दुई औषधि खानुपर्छ,अहिले फोलिकएसिड नामक छ, तर हाइड्रिया नामक औषधि छैन ।’

दाङमा १३५ जनाले नियमित औषधि लिइरहेको भए पनि औषधि अभाव भएपनि बिरामीहरुमा फेरी स्वास्थ्य समस्या देखिन थालेको छ ।