कोलम्बो– श्रीलंकाली प्रहरीले अन्तर्राष्ट्रिय आतंकवादी संगठन इस्लामिक स्टेटसँग आबद्ध रहेको आशंका गरिएका अरु १ सय ४० जनाको खोजी गरिरहेको त्यहाँका राष्ट्रपति मैत्रिपाला सिरिसेनाले जनाएका छन् ।

गत आइतबार मुलुकका विभिन्न स्थानमा भएका आत्मघाती बम आक्रमणको जिम्मा इस्लामिक स्टेटले लिएपछि त्यस संगठनसँग आबद्ध रहेको आशंका गरिएका १ सय ४० जना प्रहरीको खाजी सूचीमा रहेको राष्ट्रपति सिरिसेनाले जनाएका हुन् ।

त्यसबाहेक आक्रमणमा संलग्न रहेको आशंकामा प्रहरीले हालसम्म ७६ जनालाई पक्राउ गरिएको जनाइएको छ ।

सिरिसेनाले श्रीलंकाका केही युवाहरु सन् २०१३ यता इस्लामिक स्टेटतर्फ आकर्षित भइरहेको भन्दै मुलुकका रक्षा तथा सुरक्षा प्रमुखहरुले सम्भावित आक्रमणबारे आफूलाई कुनै पनि सूचना नदिएको समेत आरोप लगाए ।

उनले प्रधानमन्त्री रनिल विक्रमासिंघेको सरकारले गृहयुद्धका क्रममा भएको भनिएको युद्ध अपराधका लागि सैनिक अधिकारीविरुद्ध मुद्धा चलाएर मुलुकको गुप्तचर तथा रक्षा क्षेत्रलाई कमजोर बनाएको समेत आरोप लगाए ।