काठमाडौं – चितवनमा निर्माण हुन लागेको अन्तर्राष्ट्रिय स्तरको क्रिकेट रङ्गशाला निर्माण अभियान सफल बनाउने हेतुले तयार पारिएको गीत ‘रङ्गशाला बन्छ नेपालीको’ सार्वजनिक गरिएको छ । उक्त गीतमा गायक बद्री पंगेनी र पूर्णकला बिसीको आवाज सुन्न सकिन्छ ।

‘रङ्गशाला बन्छ नेपालीको’ बोलको गीतमा दुर्गा पंगेनीका शब्द छन् भने गीतमा संगीत गायक बद्री पंगेनीले नै दिएका छन् । गीतका शब्दमा नेपालीको सपनाका रुपमा यो परियोजनालाई उभ्याइएको छ । भिडियोमा धुर्मुस–सुन्तलीले गरेको कामलाई पनि देखाइएको छ ।

शंकर बिसीले यो भिडियोको निर्देशन गरेका हुन् । नेपाली खेलाडीलाई स्तरीय खेल मैदान नहुँदा चितवनमा धुर्मुस–सुन्तली फाउन्डेसनले अन्तर्राष्ट्रिय स्तरको क्रिकेट रंगशाला निर्माण गर्न लागेको बताउँदै आएको छ । गायक बद्री पंगेनीले रंगशाला निर्माणमा सबैले सहयोग गर्नुपर्ने धारणा राखे ।

यो गीत युट्युबमा धुर्मुस सुन्तली फाउन्डेसनको आधिकारिक च्यानलमा पनि हेर्न सकिन्छ ।