काठमाडौं– अख्तियार दुरुपयोग अनुसन्धान आयोगका पूर्व आयुक्त राजनारायण पाठकविरुद्ध भ्रष्टाचार मुद्दा दर्ता भएको छ ।

भक्तपुरको चागुनारायणस्थित नेपाल इन्जिनियरङ कलेजको स्वामित्व विवादका सम्बन्धमा अख्तियारमा परेको उजुरी मिलाइ दिने भन्दै घुस लिएका पूर्व आयुक्त पाठकविरुद्ध मंगलवार विशेष अदालतमा भ्रष्टाचार मुद्दा दायर भएको हो ।

अख्तियार दुरुपयोग अनुसन्धान आयोगले पूर्व आयुक्त पाठकविरुद्ध ७८ लाख रुपैयाँ बिगो र जरिवाना दावी गर्दै विशेष अदालतमा मुद्दा दायर गरेको हो ।

तत्कालीन आयुक्त पाठकले नेपाल इन्जिनियरिङ कलेजको स्वामित्व विवादका सम्बन्धमा परेको उजुरी मिलाइदिने भन्दै कलेजका सञ्चालक भनिएका लम्बोदर कुमार न्यौपानेसँग ७८ लाख रुपैयाँ घुस लिएको विषय सञ्चारमाध्यमबाट सार्वजनिक भएको थियो ।

अख्तियारले विभिन्न सञ्चारमाध्यममा प्रकाशित समाचारका आधार गरेको छानबिनबाट पाठकले घुस लिएको पुष्टि भएको जनाएको छ ।

पाठकलाई घुस दिने कलेज सञ्चालक न्यौपानेविरुद्ध पनि अख्तियारले भ्रष्टाचार मुद्दा दायर गरेको छ । अख्तियारले न्यौपानेविरुद्ध पनि ८७ लाख रुपैयाँ बिगो तथा जरिवाना माग दावी गरेको छ ।

अख्तियारले पाठकविरुद्ध भ्रष्टाचार निवारण ऐन २०५९ को दफा (३) को उपदफा (१) बमोजिम जरिवाना र कैद सजाय माग गरेको छ । जसअनुसार बिगो बमोजिम जरिवाना र ५० लाखदेखि १ करोडसम्म घुस लिने व्यक्तिलाई ६ देखि ८ वर्षसम्म कैद सजाय हुने व्यवस्था छ ।

आयुक्त पाठकका भाइ शुभ नारायण पाठकले लिएको १५ लाख रुपैयाँ घुसको सम्बन्धमा भने छुट्टै अनुसन्धान गर्ने जनाएको छ । यसअघि शुभनारायणले नेपाल इन्जिनियरिङ कलेज प्रकरणमै १५ लाख रुपैयाँ घुस लिएको तथ्य सार्वजनिक भएको थियो ।

अख्तियारले भने छानबिनका क्रममा शुभनारायणले लिएको भनिएको १५ लाख रुपैयाँ घुस कलेजसँग सम्बन्धित नभएको पत्ता लागेको जनाएको छ । जसकारण शुभनारायणले लिएको १५ लाख रुपैयाँ घुसका सन्दर्भमा छुट्टै अनुसन्धान हुने अख्यितारका प्रवक्ता प्रदीपकुमार कोइरालाले जानकारी दिए ।