काठमाडौं–स्वीडिस नागरिक योहान कालिनले नेपाली फुटबल टोलीको नेतृत्व गर्दै खेलेका दुई अन्तराष्ट्रिय मैत्रिपूर्ण खेल एकमा हार र एक बराबरी खेलेको छ । सोमबार राति घरेलु टोली कुवेतसँगको दोस्रो मैत्रिपूर्ण खेलमा नेपाल पराजित भएपछि एक हार बेहोरेको थियो । यसअघिको पहिलो खेलमा नेपाली टोलीले गोलरहित बराबरी खेलेको थियो ।

अल शबब स्टेडियममा भएको दोस्रो खेलमा नेपाल कुवेतसँग १—० गोल अन्तरले पराजित भयो । खेलको सुरुआती अग्रता बनाएको कुवेतविरुद्ध नेपालले गोल फर्काउन नसक्दा पराजित भएको हो । कुवेतका लागि खेलको २९ औं मिनेटमा पेनाल्टीमार्फत् युसुफ नासिरले गोल गर्दै टोलीलाई जीत दिलाए ।

पहिलो खेल बराबरी खेलेका नेपालले दास्रो खेलमा कुवेतलाई रोक्न नसक्दा पराजित भएको हो । नेपालले कुवेत र मलेसियासंगको मैत्रीपूर्ण खेल खेल्ने बताइएपनि फिफाले अनुमति नदिएपछि नेपालले कुवेतसँग २ मैत्रिपूर्ण खेल खेलेको हो । कुवेतविरुद्धको मैत्रिपूर्ण खेलमा टोलीका नियमित खेलाडीहरु एएफसी यु—२३ च्याम्पियनसिप छनोट खेल्न कतार जाँदा राष्ट्रिय टोलीबाट ६ जना नयाँ खेलाडीले डेब्यु अवसर पाएका छन् ।