जुम्ला- लामो समयदेखि कार्यरत कर्मचारीलाई स्थायी गर्नुपर्ने माग गर्दै कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका कर्मचारीले आन्दोलन सुरु गरेका छन् ।

तलव, सेवासुविधामा भेदभाव भइरहेको हुँदा अस्पतालमा कार्यरत २२९ कर्मचारीलाई स्थायी गर्न माग गर्दै कर्मचारीले आन्दोलन सुरु गरेका हुन् ।

प्रतिष्ठानलाई ज्ञापनपत्र बुझाउँदै उनीहरुले यस सम्बन्धी प्रस्ताव यही पुस १४ गते बस्ने सिनेटको बैठकमा लैजान माग गरेका छन् । ज्ञापनपत्रमा भनिएको छ, “कर्णालीकै स्वास्थ्य क्षेत्रको धरोहर र सम्पत्ति मानिने प्रतिष्ठानमा लामो समयदेखि कार्यरत करारका कर्मचारीलाई स्थायी गरिनुपर्ने र यस सम्बन्धी प्रस्ताव यही पुस १४ गते बस्ने सिनेट बैठकमा लैजान अनुरोध गरेको छ ।”

यो विषयमा सुनुवाइ नभएमा यही पुस ११ गतेबाट नै आन्दोलनका थप कार्यक्रम सार्वजनिक गरिने ज्ञापनपत्रमा उल्लेख छ ।

प्रतिष्ठानको नियमावली २०५९ अनुसार परीक्षा सञ्चालन गरी स्थायी गरिने व्यवस्था भए पनि बेवास्ता गर्दै प्रतिष्ठान धरापमा पार्न थालिएको कर्मचारीको गुनासो छ ।

यसअघि ८५ कर्मचारी स्थायी गरिएको भए पनि आफूहरुलाई विभेद गरिएको प्रतिष्ठानका कर्मचारी कविन्द्र महतले बताए । अस्पतालको सिनेट बैठक प्रधानमन्त्री तथा प्रतिष्ठानका कुलपति केपी शर्मा ओलीको अध्यक्षतामा बस्ने बताइएको छ ।

रामाकान्त उपाध्यायको संयोजकत्वमा संघर्ष समिति गठन गरेर करारका कर्मचारी आन्दोलित भएका छन् । स्थायीका लागि लोकसेवा आयोगले परीक्षा लिने परिपत्र भएको प्रतिष्ठानले जनाएको छ ।