काठमाडौं– सरकारले काठमाडौंमा जथाभावी रुपमा राखिएका होडिङ बोर्ड, पर्चा, पम्पलेट, पोस्टर तथा तार लगायतका सामाग्री हटाउने भएको छ ।

बिहीबार गृहमन्त्री रामबहादुर थापा ‘बादल’को प्रमुख आतिथ्यतामा गृह मन्त्रालयमा बसेको सरोकारवाला निकायहरु सहितको बैठकले उक्त निर्णय गरेको हो ।

बैठकले चार वटा समूह बनाएर शुक्रबारदेखि नै काठमाडौं महानगरपालिका भित्रका होर्डिङ बोर्ड, पर्चा, पम्पलेट, पोस्टर, भित्तेलेखन हटाउन सुरु गर्ने निर्णय गरेको हो । साथै, अन्य स्थानीय तहको हकमा संघीय मामिला तथा सामान्य प्रशासन मन्त्रालयमार्फत निर्देशन दिइ कारबाही अघि बढाउने निर्णय गरेको छ ।

बैठकले अव्यवस्थित रुपमा राखिएका टेलिफोन, केबल तथा इन्टरनेट सेवाप्रदायकका तारहरु हटाउन समयसीमा तोकी सार्वजनिक सूचना जारी गर्ने र तोकिएको अवधिभित्र नहटाए त्यस्ता तारहरुलाई काटेर हटाउने निर्णय गरेको छ ।

बैठकमा गृहमन्त्री थापाले नागरिकको स्वास्थ्य र नगरको पर्यावरणीय सुन्दरतालाई मध्यनजर गर्दै नगरलाई कुरुप बनाउने गरी राखिएका त्यस्ता संरचनाहरु हटाउन लागिएको बताए ।

सर्वोच्च अदालतको समेत यस सम्बन्धमा आदेश दिइसकेको बताउँदै गृहमन्त्री थापाले सो आदेश कार्यान्वयन गर्न सरकार प्रतिवद्ध रहेको बताए ।

काठमाडौं महानगरपालिकाका मेयर विद्यासुन्दर शाक्यले महानगरपालिका भित्र शुक्रबारबाट नै त्यस्ता संरचना हटाउन शुरु गर्ने प्रतिवद्धता व्यक्त गरे ।
गृह मन्त्रालयका सचिव प्रेमकुमार राईले देशभरका यस्ता संरचना हटाउन सम्बन्धित जिल्ला प्रशासन कार्यालय र प्रहरी प्रशासनको पूर्ण सहयोग रहने बताए ।