काठमाडौं-पेरिस सेन्ट जर्मेन पीएसजीका स्टार केलियन एम्बाप्पेले आफु यसबर्षको बालेन डी ओर जित्नका लागि लायक नभएको बताएका छन् । उनले करियरको अगामी दिनमा सो सम्मान हासिल गर्न सकिने बताएका हुन् ।

२० बर्षिया खेलाडी एम्बाप्पे अवार्डको प्रारम्भिक सुचिमा रहेका छन् । लिभरपुलका भर्जिल भान डिजिक, बार्सिलोनाका लियोनल मेस्सी र युभेन्ट्सका क्रिस्टियानो रोनाल्डो अवार्डका मुख्य दाबेदार हुन् ।

एम्बाप्पेले यस बर्षको अवार्ड जित्ने आफ्नो सम्भावना पातलो रहको उल्लेख गरेका छन् । बालेन डी ओर जित्ने सम्भावाबारे एम्बाप्पेले भनेका छन्, ‘म निकै व्यवहारिक हुनुपर्छ । म यसको लायक छैन । त्यहाँ तीन खेलाडी यसको मुख्य दाबेदार हुन् ।’

‘पीएजीमा हामीले सबै उपाधि जित्न सकेनौ । र च्याम्पियन्स लिगमा खराब नतिजा ब्यहोर्यौ ।’ उनले भनेका छन् । ‘व्यक्तिगत रुपमा मैले धेरै अवार्ड जितेको छु । तर फुटबल एक्लै खेलिदैन । यसलाई स्विकार गर्नैपर्छ ।’ उनले थपे ।

‘यो जित्न मसंग अझै समय छ । म आत्तिएको छैन । यसले मलाई दुखी बनाउँदैन,’ एम्बाप्पले भनेका छन् । उनले सन् २०१९ मा पीएसजीबाट लिग वानको उपाधि जितेका थिए । तर पीएसजी च्याम्पियन्स लिगको अन्तिम १६ को खेलमा म्यान्चेष्टर युनाईटेडबाट निराश भएको थियो ।

च्याम्पियन्स लिगको उपाधि जितेका डिजिक अवार्डका मुख्य दोबदार हुन् । उनको क्लब लिभरपुल प्रिमियर लिगमा दोस्रो बनेको थियो । यस्तै बार्सिलोनाका मेस्सी समेत छैटौ पटकका लागि अवार्डको मुख्य दाबेदार मानिएका छन् ।

व्यक्तिगत रुपमा सबै प्रतियोगितामा क्लबबाट ५० गोल पुरा गरेका उनले ला लिगाको उपाधि रक्षा गरेका थिए ।