काठमाडौं- प्रहरीले वैदेशिक रोजगार ठगी मुद्दामा फरार रहेका एक अभियुक्तलाई पक्राउ गरेको छ । प्रहरीको केन्द्रीय अनुसन्धान ब्यूरो (सिआइवी)को टोलीले ठगी मुद्दामा फरार रहेका सिन्धुपाल्चोक शिखरपुरका भीमप्रसाद दाहाललाई पक्राउ गरेको हो ।

सिआइवीका प्रवक्ता उमा चदुर्वेदीका अनुसार, खोजी सूचीमा रहेका दाहाललाई नयाँ बानेश्वरबाट पक्राउ गरेको हो । दाहालमाथि रोजगारीको लागि दक्षिण कोरिया पठाइदिने भन्दै हेमलाल गौतमबाट तीन लाख ५० हजार रुपैयाँ लिई फिर्ता नगरेको अभियोग लागेको थियो ।

उनलाई ठगी मुद्दामा वैदेशिक रोजगार न्यायाधीकरणको २०७४ पुस ३० गते एक लाख ५० हजार रुपैयाँ जरिवाना र १ वर्ष ६ महिना कैद सजाय हुने ठहर गरेको थियो । उनी विरुद्ध जरिवानासहितको बिगो पाँच लाख २५ हजार भराउने फैसला भएको थियो ।

अहिले दाहाललाई प्रहरीले काठमाडौँ जिल्ला अदालतमा पेस गरी केन्द्रीय कारागार सुन्धारा चलान गरेको छ ।