काठमाडौं–नेता रामचन्द्र पौडेलसहित १२ नेताको असहमति हुँदाहुँदै पनि नेपाली कांग्रेस केन्द्रीय कार्यसमितिको बैठकले महासमितिबाट पारित पाँच प्रस्ताव पारित गरेको छ । महासमिति बैठकका सुझाव समेटेर विधान, राजनीतिक, सांगठनिक, आर्थिकसहितका प्रस्ताव केन्द्रीय समितिको आइतबारको बैठकले बहुमतका आधारमा पारित गरेको नागरिक दैनिकमा खबरछ ।

बम विस्फोट ‘आतंककारी’ गतिविधि शीर्षकको अर्को समाचारमा विभिन्न क्षेत्रका प्रबुद्ध व्यक्तिले ललितपुरको नख्खुस्थित एनसेल मुख्यालयअगाडि भएको बम विस्फोटको घटनालाई आतंककारी गतिविधि भएको बताएका छन् । सर्वसाधारणको ज्यान जानेगरी भएको विस्फोटन आतंककारी तथा आपराधिक घटना भएको उनीहरुको टिप्पणी छ । यो घटना निन्दनीय रहेको भन्दै गृहमन्त्री रामबहादुर थापाले दोषीलाई कानुनी कठघरामा ल्याइछाड्ने बताएका छन् ।

सांसदको ज्यान गएपछि सडक सुरक्षा कार्यदल शीर्षकको समाचारमा प्रदेश पाँच सरकारले सडक सुरक्षा कार्यदल बनाएको छ । यो प्रदेशमा दैनिक झण्डै दुई जना सर्वसाधारणले सडक दुर्घटनामा ज्यान गुमाउने गरेपनि प्रदेशसभा सांसद उत्तरकुमार वलीको सडक दुर्घटनामा परी उपचारका क्रममा मृत्यु भएपछि सडक सुरक्षा सुझाव कार्यदल गठन गरेको छ ।