भक्तपुर– आफ्नो मोबाइल प्रहरीले लग्यो भन्दै प्रहरीकै कन्ट्रोल रुममा फोन गर्ने व्यक्ति पक्राउ परेका छन् ।

पक्राउ पर्नेमा काठमाडौंको स्यूचाटार बस्ने २५ वर्षीय आकाश भट्टराई छन् ।

प्रहरीका अनुसार आकाशले भक्तपुरको सूर्यविनायक नगरपालिका–२ बालकोटस्थित दूर्गा मन्दिरबाट आफ्नो मोबाइल प्रहरीले लगेको भन्दै प्रहरीको कन्ट्रोल रुम (१०० नम्बर)मा फोन गरेका थिए ।

आकाशको फोनपछि प्रहरीले उनको मोबाइलबारे खोजी गरेको थियो । तर, पछि उक्त मोबाइल आकाशले आफ्नै साथीलाई दिएको भेटिएको छ ।

आफ्नो साथीलाई दिएको मोबाइल प्रहरीले जफत गरेको भनेर प्रहरीलाई नै गलत सूचना दिएको अभियोगमा आकाश पक्राउ परेका हुन् ।

प्रहरीले आकाशमाथि थप अनुसन्धान भइरहेको जनाएको छ ।