काठमाडौं– चितवन प्रहरीको हिरासतमा रहेका टेलिभिजन प्रस्तोता रवि लामिछानेको रिहाइका लागि कलाकार एकजुट भएका छन् । शनिबार काठमाडौंमा पत्रकार सम्मेलन गरी रविको समर्थनमा जुटेका कलाकारहरु राति चितवन पुगेका हुन् ।

कलाकार दिपकराज गिरि, दिपाश्री निरौला, केदार घिमिरे लगायतका कलाकारहरु अहिले चितवनमा रविको रिहाइका लागि पर्खेर बसेका छन् ।

‘उहाँ साच्चै महान हुनुहुन्छ, हिरासतमा बसेर पनि उहाँमा साहस र हिम्मत देख्दा खुशी लागेको र त्यहाँको दृश्यले आफूहरुलाई निकै दुखी बनायो ’ कलाकार दिपाश्री निरौलाले बताइन् ।

पत्रकार शालिकराम पुडासैनीको प्रकरणमा रविसहित तीन जनालाई हिरासत मै राखेर अनुसन्धान थालिएको छ । प्रहरी हिरासतमा रहेका लामिछानेसहित, युवराज कँडेल, अम्मिता भनिने रुकु कार्कीलाई जिल्ला अदालत चितवन पेस गरिँदै छ । प्रहरीले जुटाएको प्रमाणको आधारमा सरकारी वकिलको कार्यालयले अदालत समक्ष मिसिल पेस गर्छ ।

यसअघि जिल्ला अदालत चितवनका न्यायाधीश केशव अधिकारीको एकल इजालासले लामिछाने सहित तीन जनालाई थप पाँच दिन हिरासतमा राखेर अनुसन्धान गर्न अनुमती दिएको थियो ।