११८ अनाथ बालबालिका पालेर ‘लभ मदर’को छवि बनाएकी एक महिलालाई २० वर्षको जेल सजाय सुनाइएको छ ।

यो खबर चीनको हो । अहिले ५४ वर्ष पुगेकी हेवेइ प्रान्तमा बस्ने ली यान्सीलाई हेवाइ प्रान्तको अदालतले २० वर्षको जेल सजाय तोकेको हो । उनीमाथि जबर्जस्ती असुली, धोकाबाजी, जालसाजी र सामाजिक व्यवस्था विथोलेको आरोप छ ।

उनलाई ३ लाख ८८ हजार अमेरिकी डलर जरिबाना गरिएको छ। उनको प्रेमीसहित अन्य १५ जनालाई पनि सजाय तोकिएको बीबीसीले जनाएको छ।

अदालतले लीले अनाथालयको प्रभावका दुरूपयोग गरेको पाइएको बताएको छ। “उनले आर्थिक फाइदा र अन्य अपराधका लागि समूहमा अन्यसँग मिलेर धोकाबाजी गरेकी छन्,” अदालतले सामाजिक सञ्जालमा हालेको सूचनामा लेखिएको छ।

उनको प्रेमी सु चीलाई साढे १२ वर्ष जेल सजाय र जरिबाना तिराइएको छ। अन्यलाई चार वर्षसम्मको जेल सजाय तोकिएको छ।

सन् २००६ मा लीले आफ्नो प्रान्तमा दर्जनौँ अनाथ बालबालिकालाई पालिरहेको खबर छापिएपछि उनी चर्चित भएकी थिइन्।

उनले आफूले वैवाहिक सम्बन्ध बिच्छेद गरेको र पूर्वपतिले सात हजार युआनमा बेचेको छोरालाई फिर्ता पाएपछि अन्य बालबालिकालाई सहयोग गर्न थालेको बताएकी थिइन्।

त्यसपछिका वर्षहरूमा उनले अकुत सम्पत्ति कमाइन् र प्रान्तकै सबैभन्दा धनी महिला बनिन्। उनले फलाम खानी पनि किनेकी थिइन्।

उनले थुप्रै बालबालिकाहरूलाई पाल्न थालेपछि लभ भिलेज अर्थात मायाको गाउँ नामक अनाथालय खोलिकी थिइन्।

सन् २०१७ मा उनको अनाथालयमा भएको बालबालिकाको सङ्ख्या एक सय १८ थियो।

त्यही वर्ष सरकारले उनको शङ्कास्पद् गतिविधिको बारेमा खोज शुरू गरेको थियो। सन् २०१८ को मेमा उनको खातामा दुई करोड युआन र २० हजार अमेरिकी डलर भएको पत्ता लगाएको थियो। उनीसँग ल्यान्ड रोभर र मर्सेडिज बेञ्जजस्ता विलासी गाडीहरू पनि थिए।

सन् २०११ देखिनै उनले गैरकानुनी काम गरिरहेको बताइएको छ।