सान हुआन– अमेरिकी प्रशासनमा रहेको पुर्टो रिको टापुका गभर्नर रिकार्डो रोजेलोले राजीनामा दिएका छन् ।

उनको निकै रंगभेदी तथा लिंगभेदी सन्देश सार्वजनिक भएपछि उनलाई राजीनामा दिन दबाब थियो । ती सन्देशकै कारण उनीविरुद्ध सोमबार दशौं हजारले प्रदर्शन गरेका थिए ।

उनले बुधबार अबेर भिडियो सन्देश जारी गर्दै राजीनामाको घोषणा गरेका हुन् । भिडियो सन्देशमा उनले राजनीतिक संक्रमणका लागि आगामी अगष्ट २ सम्म आफ्नो जिम्मेवारीमा रहने समेत उल्लेख गरेका छन् ।

गत जुलाई १२ मा सार्वजनिक भएको उनी र उनका ११ साथीहरुले लेखेको लिंगभेदी तथा रंगभेदी सामूहिक सन्देशका कारण चर्को आलोचना र विरोध भएपछि उनलाई राजीनामा दिन दबाब रहेको थियो ।

उनले आफ्ना साथीहरुलाई पठाएको सन्देशमा ४ हजार भन्दा धेरै मानिसहरु मारिएको सन् २०१७ को मारिया नामक आँधीका पीडितहरु प्रति व्यंग्य गरिएको थियो । त्यसबाहेक उक्त सन्देशमा न्यूयोर्क शहर परिषद्की पूर्व प्रवक्ता प्रति निकृष्ट शब्दमा टिप्पणी गरिएको थियो ।

गत आइतबारमात्र उनले आफूविरुद्धको आलोचनालाई साम्य पार्नका लागि आगामी निर्वाचनमा उम्मेद्वारी नदिने घोषणा गरेका थिए । उनले आइतबार आफूले राजीनामा भने नदिने जनाएका थिए ।

उनको स्थानमा त्यहाँकी न्यायमन्त्री वाण्डा भाजकेजले गभर्नरको जिम्मेवारी सम्हाल्ने अमेरिकी सञ्चारमाध्यमले जनाएका छन् ।