इस्लामावाद– तीन दिने अमेरिका भ्रमण सकेर बिहीबार स्वदेश फर्केका पाकिस्तानी प्रधानमन्त्री इमरान खानले आफूलाई विश्वकप जितेर फर्केजस्तो महशुस भइरहेको टिप्पणी गरेका छन् ।

अमेरिकी राष्ट्रपति डोनाल्ड ट्रम्पसँग भेटवार्ता गरी स्वदेश फर्केका उनलाई समर्थकहरुले स्वागत गरेका थिए । सोही क्रममा उनले आफूलाई विश्वकप जितेर फर्केजस्तो महशुस भइरहेको टिप्पणी गरेका हुन् ।

मुलुकको अर्थतन्त्रलाई असर नपरोस् भन्नाका लागि कतार एअरवेजको विमान चढेर आएका उनका समर्थकले विमानस्थलबाहिर उनको पक्षमा नाराबाजी गरेका थिए । अमेरिका भ्रमणका क्रममा उनले अमेरिकी राष्ट्रपति डोनाल्ड ट्रम्पसहित अमेरिकी विदेशमन्त्री माइक पम्पेओ तथा अन्य वरिष्ठ अमेरिकी अधिकारीसँग वार्ता गरेका थिए ।

वार्ताका क्रममा दुई मुलुकबीचको द्विपक्षीय साझेदारी तथा प्रतिआतंकवादका विषयमा छलफल भएको थियो ।

सन् १९९२ मा भएको क्रिकेट विश्वकप जितेको पाकिस्तानी टोलीका कप्तान रहेका उनी ठिक एक वर्षअघि जुलाई २५ कै दिन निर्वाचनमा विजयी भएका थिए । कतार एअरवेजको विमानमार्फत् फर्केका उनले कतारको राजधानी दोहामा रोकिएर त्यहाँका समकक्षीसँग अब्दुल्लाह बिन नासेर बिन खलिफा अल थानीसँग पनि भेटवार्ता गरेका थिए ।

अमेरिकामा उनले अमेरिका तथा पश्चिमा मुलुकहरुसमक्ष पाकिस्तानीहरुले कमाएर विदेशमा लुकाएको कालो धन फर्काउन समेत आग्रह गरेको बताइएको छ ।

प्रधानमन्त्री खानको अमेरिका भ्रमणलाई पाकिस्तानमा ठूलो कूटनीतिक विजयीको रुपमा अथ्र्याइएको छ ।