काठमाडौं – नेपाली राष्ट्रिय महिला क्रिकेट टोलीकी कप्तान रुविना क्षेत्रीले आफूहरुको योगदान युवा तथा खेलकुद मन्त्रालयले नबुझेको भन्दै दुखेसो पोखेकी छन् ।

बुधबार युवा तथा खेलकुद मन्त्रालयले साफ उपविजेता महिला खेलाडीसहित पछिल्लो समय अन्तर्राष्ट्रिय प्रतियोगितामा उत्कृष्ट प्रदर्शन गरेका खेलाडी तथा खेलकर्मीलाई सम्मान गरेपछि कप्तान क्षेत्रीले फेसबुकमार्फत असन्तुष्टि जनाएकी हुन् । सरकार तथा सम्बद्ध निकायले खेलकर्मीलाई सम्मान गर्नु स्वागत योग्य भएको उल्लेख गर्दै महिला टोलीको मेहनतको नजरअन्दाज गरिएको बताएकी छन् ।

थाइल्याण्डमा सम्पन्न टि–ट्वान्टी स्म्यासको उपविजेता र विश्वकप छनोटमा उपविजेता बनेको राष्ट्रिय महिला टोलीको योगदानलाई सरकारले बिर्सिएको भन्दै उनले सामाजिक सञ्जाल फेसबुकमा स्टाटस लेखेकी हुन् ।

असन्तुष्ट रुविनाले सरकारप्रति आक्रोश पोख्दै प्रश्न राखेकी छन्, ‘सबैले आफ्नो हकको सम्मान पाउँदा के हामीलाई चाहिँ सम्मानको हक छैन ?’

हक्की र स्पष्ट कप्तान क्षेत्रीले महिला क्रिकेट सुस्ताएको समयमा पाएको अन्तर्राष्ट्रिय सफलता र खेलाडीको मेहनतको कदर नभएको गुनासो गरेकी हुन् ।
‘कसलाई सोधौँ, म यो प्रश्न ? कसलाई भनौं कि हामीलाई कति धेरै दुःख छ । हामीलाई पनि जिउने बाटो दिनुस्,’ रुविनाले लेखेकी छन् ।

कप्तान क्षेत्रीले आगामी दिन महिला क्रिकेटमा लाग्न नयाँ खेलाडीलाई कसरी उत्प्रेरणा दिने भन्दै गम्भिर प्रश्न पनि गरेकी छन् ।